شکورجان زوهاروف، رییس شورای ملی تاجیکستان در دیدار با صلاح الدین ربانی وزیر امور خارجه افغانستان در تاجیکستان گفته که دوشنبه آماده است تا روابط اش را با افغانستان گسترش بدهد.

او افزود: ما آماده هستیم تا روابط خود را با کشورهای منطقه به ویژه با جمهوری اسلامی افغانستان گسترش بدهیم. امنیت افغانستان تنها برای تاجیکستان نه، بلکه برای تمام آسیای میانه مهم است.

رییس شورای ملی تاجیکستان همچنان از آمادگی این کشور برای آوردن صلح و ثبات، مبارزه با تروریسم، قاچاق مواد مخدر و جرم‌های سازمان یافته خبر داد.

آقای زوهاروف، تطبیق پروژه‌های منطقوی برای ثبات در افغانستان را نیز مهم خوانده و افزود که تاجیکستان آماده انتقال انرژی برق به افغانستان از طریق پروژه کاسا یک‌هزار است.

از سویی هم، صلاح الدین ربانی، تاجیکستان را کشور برادر خواند و گفت که این‌کشور در شرایط بد امنیتی در کنار افغانستان قرار گرفته است.

دو طرف همچنان روی مسایل امنیت افغانستان و تأثیر آن در منطقه، گفتگوهای صلح و همکاری‌های منطقه‌ای گفتگو کردند. 

سایت خبری آرزو – فردوس پیرزاد