رییس‌جمهور تاجیکستان در دیدار با عبدالله‌عبدالله گفته که برقراری ثبات در افغانستان به معنی امنیت در منطقه است.

 

رییس شورای عالی مصالحه ملی که دیروز به دوشنبه‌، پایتخت تاجیکستان رفت؛ امروز (سه‌شنبه، دوم جدی)، با امام‌علی رحمان رییس جمهور تاجیکستان دیدار کرده‌است.

امام‌علی رحمان گفته‌است: افغانستان، تاجیکستان و منطقه از تروریزم، افراط‌گرایی و بی‌ثباتی متضرر شده‌اند. تامین صلح و ثبات در افغانستان زمینه‌ی گسترش و توسعه‌ی تجارت و ترانزیت میان دو کشور، منطقه و اتصال آسیای مرکزی به جنوب آسیا را فراهم می‌سازد.

عبدالله‌عبدالله هم‌چنان گفته که دولت تاجیکستان از تلاش‌های صلح در افغانستان و تصمیم دولت افغانستان در این زمینه حمایت می‌کند.

در ماه‌های اخیر، مقام‌های بلند پایه‌ی حکومتی سفرهای زیادی به کشورهای منطقه داشته‌اند و حکومت هدف این سفرها را تقویت اجماع منطقه‌ای از روند صلح گفته‌اند.

به تازه‌گی، حمدالله محب، مشاور امنیت ملی هم از آذربایجان به ایران سفر کرده‌است.

رحمت‌الله اندر، سخنگوی دفتر مشاوریت شورای امنیت ملی گفت که آقای محب در دیدار با مقام‌های ایرانی پیرامون اوضاع افغانستان رایزنی کرده است.

برخی رسانه‌های ایرانی به نقل از حمدالله محب نیز گزارش داده که دولت افغانستان در برابر زیاده‌خواهی گروه طالبان در میز گفتگوها ایستاده‌گی می‌کند.

هم‌اکنون هیأت‌های دولت افغانستان و گروه طالبان در وقفه‌ی 23 روزه به‌سر می‌برند.

غلام فاروق مجروح، عضو هیات گفتگو کننده دولت افغانستان گفت که هیات مذاکراتی حکومت، سرگرم مشورت‌ها با رهبری حکومت و جریان‌های سیاسی برای دور دوم گفتگوها است.

هیات گفتگوکننده دولت تااکنون با رییس‌جمهور و رییس شورای مصالحه ملی دیدار کرده و قرار است روز پنجشنبه همین هفته، باردیگر نشست شورای عالی مصالحه ملی برگزار شود.

مهم‌ترین موردی‌که انتظار می‌رود پیش از آغاز دور دوم مذاکرات بحث شود، مکان این دور گفتگوها می‌باشد. پیش ازاین رییس جمهور غنی خواستار ادامه مذاکرات در داخل کشور شده بود.