سران تاجیکستان و افغانستان، بر گسترش همکاری‌ها در بخش‌های مختلف میان دو کشور، تاکید کردند.

رییس‌جمهورغنی بامداد امروز (دوشنبه، نهم حمل)، جهت شرکت در نشست قلب آسیا – روند استانبول، به دوشنبه پایتخت تاجیکستان رفت.

روسای جمهور دو کشور روی گسترش مناسبات میان دوشنبه – کابل و همکاری‌ها در بخش‌های مختلف تبادل نظر نمودند.

امام‌علی رحمان دراین نشست گفت که همکاری دو کشور بر اصل برادری و حسن همجواری استوار است.

از سویی هم، محمداشرف غنی گفته که تاجیکستان در “پنج حلقه سیاست خارجی افغانستان در سه حلقه، همچون همسایه، کشور اسلامی و مملکت کلیدی در آسیای متحول، نقش کلیدی دارد.”

آقای غنی بیان داشت که افغانستان و تاجیکستان هیچ‌گونه اختلاف در موارد بنیادی ندارند و کابل می‌خواهد مرز دو کشور، به سرحد همکاری، هماهنگی و همدلی مبدل گردد.

افغانستان و تاجیکستان در حاشیه‌ی نشست قلب آسیا هم‌چنین سندهای همکاری در پیوند به همکاری‌های امنیتی، تجارتی، ترانزیت، حمل‌ونقل، انرژی و فرهنگی را به امضاء رساندند.