دولت تاجیکستان از مذاکرات صلح و موقف حکومت افغانستان دراین روند حمایت می‌کند.

رییس جمهور تاجیکستان در دیدار با محمدحنیف اتمر سرپرست وزارت خارجه افغانستان، از آغاز مذاکرات میان‌آفغان‌ها خوشبینی نموده و گفته که کشورش متعهد به حمایت از افغانستان است.

در خبرنامه وزارت امور خارجه آمده است: امام‌علی رحمان، با تأکید بر توسعه‌ی روابط دو کشور در بخش‌های اقتصادی، تجارتی و علمی – فرهنگی، همکاری با افغانستان را از اولویت‌های سیاست خارجی تاجیکستان دانست و گفته که دوشنبه، همواره از موقف دولت افغانستان در تأمین امنیت و صلح پایدار پشتیبانی نموده‌است.

از سویی هم، مشاور شورای امنیت ملی تاجیکستان در دیدار با آقای اتمر، از آماده‌گی این‌کشور برای مبارزه با تروریزم، تأمین امنیت مرزها و جلوگیری از قاچاق مواد مخدر اطمینان داده است.

محمد حنیف اتمر در راس یک هیأت بلندپایه دولتی، روز گذشته (پنج‌شنبه، 27 سنبله)، به تاجیکستان سفر کرد.

وزارت امور خارجه کشور، هم‌چنان از امضای سندهای همکاری میان کابل – دوشنبه، در بخش‌های امنیتی، اقتصادی و ترانزیتی خبر داد.