زلمی خلیل‌زاد، فرستاده وزارت خارجه آمریکا برای صلح افغانستان امروز (شنبه)، در سفر به تاجیکستان، با امام‌علی رحمان، رییس جمهور تاجیکستان دیدار کرده‌است.

براساس گزارش‌ها؛ دوطرف روی وضعیت فعلی افغانستان به ویژه روند مذاکرات صلح و همچنین مسایل منطقه‌ای و جهانی گفتگو نمودند.

رییس جمهور تاجیکستان دراین دیدار گفته که توسعه روابط چند وجهی دوشنبه با کابل پیوسته در مرکز توجه تاجیکستان قرار داد.

آقای رحمان گفته که تاجیکستان از موضع دولت افغانستان برای تامین امنیت و صلح و ثبات حمایت نموده و از گفتگوهای میان‌افغان‌ها استقبال می‌کند.

دو طرف همچنین پیرامون اهمیت پیگیری بیشتر مسایل مربوط به توسعه و گسترش همکاری بین تاجیکستان و ایالات متحده بحث کرده‌اند.

خلیل‌زاد و رییس‌جمهور تاجیکستان به لزوم تقویت همکاری در مبارزه مشترک با تروریسم، افراط‌گرای، قاچاق مواد مخدر و جرم‌های سازمان یافته فراملی نیز گفتگو نموده و اما‌م‌علی رحمان از تلاش‌های کشورش برای کمک به حل مشکلات افغانستان و بازسازی اقتصادی و اجتماعی آن اطمینان داده‌است.