باشنده‌های سمنگان ادعا دارند که شماری از زورمندان محلی زمین‌های اماکن باستانی دراین ولایت را غصب کرده‌اند.

آنان می‌گویند، زورمندان محلی زمین‌های اطراف تخت‌رستم را غصب نموده و آن‌را شهرک‌های رهایشی ساخته‌اند.

باشنده‌های سمنگان هم‌چنان مدعی اند که زورمندان محلی به گونه‌ی غیرقانونی جنگلات پسته این ولایت را قطع می‌کنند و حکومت باید دراین خصوص توجه نماید.

اما محمد امین عزیز، مدیر حفظ میراث‌های طبیعی ریاست اطلاعات و فرهنگ سمنگان غصب زمین‌های دولتی از سوی زورمندان را رد کرد. آقای عزیز تأکید کرد که در محوطه زمین‌های باستانی این ولایت هیچ نوع شهرکی ساخته شده است.

از سویی دیگر، عبدالمنیر رحیمی سخنگوی پولیس سمنگان به آرزو گفت که فرماندهی پولیس این ولایت بررسی‌ها درخصوص غصب زمین‌های مربوط به تخت‌رستم را آغاز کرده‌اند.

خواستیم دراین مورد دیدگاه ریاست عدلیه ولایت سمنگان را نیز داشته باشیم، اما با تلاش‌ها پی‌هم موفق نشدیم.