ولسمشر غني وایي چې په هیواد کې ملي ټلواله، د فعالې ډیپلوماسۍ لپاره په نړیوالې ټلوالې اوښتې او د تاوتریخوالي ډیریدو د جمهوریت حقانیت ثابت کړی دی.

 

محمد اشرف غني چې نن (پنځنۍ، سلواغې۳۰مه)، د ژنیف ناستې په کارغاله کې وینا کوله، ویې ویل چې تاوتریخوالی، سیاسي حل لاره نده، بلکې یوه هراړخیزه هوکړه چې د ټولو هیوادوالو لپاره د منلو وي، کولای شي افغانستان له دې کړکیچ څخه بهر کړي.

هغه زیاته کړه: دنیا درک کړې چې مونږ د یوې ټولنې، ملت او دولت په توګه له تاوتریخجنو بریدونو سره مخ یو او زمونږ د مدني ټولنې، خبریالانو او د علمي، سیاسي او ټولنیزو شخصیتونو قربانۍ، د ټولې نړۍ د همدردۍ لامل شوي.

ولسمشر زیاته کړه چې د تلپاتې سولې لپاره ملي ټلواله، په نړیوالې ټلوالې او فعالې ډیپلوماسۍ اوښتې او د تاوتریخوالي ډیروالی د دې لامل شوی چې د جمهوریت مشروعیت لا روښانه شي.

ښاغلي غني یادونه وکړه: “د تلپاتې او باعزته سولې لپاره زمونږ ملي ټلواله، نن د تلپاتې او پایښت لرونکې سولې په موخه د فعالې ډیپلوماسۍ لپاره په نړیوالې ټلوالې اوښتې او تر هماغه کچه چې تاوتریخوالی ډیر شوی، د جمهوریت د حقانیت کچه هم ثابته شوې او روښانه اړتیا ده چې پر طالبانو او ملاتړو یې مثبت او هراخیز فشارونه ور وړل شي او دا د یوې سیمه ییزې او نړیوالې اړتیا په توګه احساس شوې ده.”

ولسمشر غني په داسې حال کې پر طالبانو او د دې ډلې پر ملاتړو د فشار وروړلو خبر کوي چې د امریکا په ګډون نړیوالې ټولنې تل د طالبانو له لورې د تاوتریخوالي په کمیدو ټینګار کړی.

پنټاګون هم مخکې له دې طالبان د تاوتریخوالي د کمیدو او له ترهګریزو ډلو سره د اړیکو شلولو اړوند د دوحې د هوکړه لیک په نقض تورن کړي دي. خو طالبانو د دوحې د هوکړه لیک تر پښو لاندې کول رد کړي او د امریکا له نوې ادارې یې غوښتي چې په دې سند کې په خپلو ژمنو ولاړ اوسي.