د ولسمشر لومړی مرستیال امرالله صالح پر کابل پوهنتون د برید د طرحه کوونکي له نیولو خبر ورکوي.
ښاغلي صالح په خپله فیسبوک پاڼه کې لیکلي دي چې دا کس عادل نومیږي د پنجشیر اصلي اوسیدونکی دی او کورنۍ یې په پلچرخي کې ژوند کوي.
د ښاغلي صالح په وینا دې کس تر درییم ټولګي د شرعیاتو په څانګه کې زدکړې کړي او د حقاني شبکې پخواني غړي ثناالله له لوري په دې ډله کې جذب شوی دی.
د ولسمشر لومړي مرستیال همدا راز لیکلي دي چې عادل نومي ویلي دي چې وسله یې په خوست ولایت کې له حقاني شبکې ترلاسه کړې او دا کار یې د ثناالله په سپارښتنه د حکومت کمزوري ښودلو لپاره ترسره کړی دی.