د افغانستان د سولې لپاره د امریکا ځانګړی استازی د افغانانو ترمنځ د سولې د خبرو د غوټې د خلاصولو لپاره، دوحې ته تللی دی.

 

د حکومت او طالبانو ډلې د مرکچي پلاویو ترمنځ د څو ورځیني کړکیچ سره هم مهاله، د افغانستان د سولې لپاره د امریکا ځانګړی استازی قطر ته تللی دی.

د امریکا د بهرنیو چارو وزارت اعلان کړی چې خلیل زاد د څلورنۍ په ورځ (تلې ۹)، دوحې ته رسیدلی او تمه ده د دواړو لوریو له پلاوي سره په خبرو کې د پرمختګونو اړوند لیدنې وکړي.

ښاغلي خلیلزاد هم په خپله ټویټر پاڼه لیکلي چې په دې سفر کې هڅه کیږي چې د امریکا متحده ایالتونو له شریکانو سره د سولې د خبرو، د سولې وروسته د لرلید او سیمه ییزې نښلیدنې اړوند لیدنه ولري.

هغه پر دوام لیکلي، نړیواله ټولنه او د افغانستان ښاریان تمه لري چې خبرې باید د راتلونکي سیاسي لارې د نقشې د جوړیدو او پراخ اوربند لامل وګرځي.

۱/۲ – بیرته د دوحې او سیمې په لور ځم چې له شریکانو سره د افغانانو په مالکیت او مشرۍ د سولې د مذاکراتو او د سولې پسې د سیمیزې نښلتیا، سوداګرۍ او د ودې د پراختیا په اړه وغږیږو.‌

— U.S. Special Representative Zalmay Khalilzad (@US4AfghanPeace) September 29, 2020

ولسمشرۍ همداراز په خبرو کې په خپل مخکیني دریځ ټینګار لري. د اوربند ټینګښت او د تاوتریخوالي پایته رسیدل. صدیقي وایي، د نښتو دوام، هیوادوال د سولې د ټینګیدو په تړاو نهیلي کوي.

د ملي روغې جوړې د لویې شورا ویاند چې په دوحه کې دی، تمه لري چې دې ښار ته د زلمي خلیلزاد سفر د خبرو د څوکاټ د جوړیدو اړوند پیچلې غوټه خلاصه کړي.

آندونه دا دي چې د خبرو د څوکاټ جوړیدل چې د راتلونکو خبرو بنسټ دی؛ له دې کبله پر دې د دواړو لوریو دقت کولای شي اصلي خبرې آسانه کړي.

په دوحه کې د افغانانو ترمنځ د خبرو له پیله نږدې دوه اوونۍ تیریږي. خو تراوسه دواړه لوریو د پام وړ پرمختګ ندی لرلی.

د خبرو څوکاټ نږدې ۲۱ مادې لري چې یوازې په دوو مواردو یې اختلاف شتون لري.