ولسمشر غني د امریکاییانو او طالبانو ترمنځ د سولې د هوکړه لیک وروسته د تاوتریخوالي په پایله کې د دولتي ځواکونو له مرګ ژوبلې ټکان ورکوونکې شمیرنې وړاندې کړې.

 

ولسمشر غني نن (درې نۍ، زمري اوومه)، د سام په څلورمې ناسته کې وویل چې په تیرو څلورو میاشتو کې، ۳زره  او ۵۶۰ دولتي ځواکونو خپل ژوند له لاسه ورکړی او شپږ زره او ۷۸۱ تنه نور ټپیان شوي دي.

د حکومت په باور، دا شمیرنه د طالبانو له لورې د تاوتریخوالي د ډيریدو او  د دوحې د هوکړه لیک د نقض ښکارندويي کوي.

ولسمشر غني تر نږدې ورځو د طالبانو د پنځو زرو بندیانو د خوشې کیدو بهیر د بشپړیدو خبر ورکوي او هیله مني ښيي چې تر یوې اوونۍ به طالبان د افغانانو ترمنځ د خبرو میز ته حاضر شي.

ښاغلی غني همداراز ټینګار لري چې باید د دولت د سولې د هڅو پر دوام، په هیواد کې د اوربند د ټینګیدو لپاره هم زمینه برابره شي.

په دې ناسته کې د ملګرو ملتونو سازمان ځانګړې استازې، د تاوتریخوالي او ملکي مرګ ژوبلې له دوامه اندیښنه ښودلې او له ټولو لوریو یې غوښتي چې د لوی اختر رارسیدو سره سم، تاوتریخوالی باید کم شي.

د طالبانو له لورې د اوربند د ټينګیدو غوښتنه په داسې حال کې مطرح کیږي چې نن ماښام دې ډلې په یوه پیغام کې، د اختر په درییو ورځو کې اوربند اعلان کړ.