په هیواد کې د کرونا ویروس د خپریدو له ډیریدو سره، یو شمیر دیني عالمان په منځمهاله توګه دیني او مذهبي راټولیدنې ممنوع اعلان کړې.

 

یو شمیر دیني عالمانو نن(یوه نۍ، اوري ۱۷/اپریل۵)، په کابل کې په یوې ناسته کې د کرونا ویروس د ګواښ تر لمنځه تلو د هر ډول دیني او مذهبي راټولیدنو په ممنوعیت ټینګار وکړ.

دوی د یوې فتوا په صادرولو سره د جوماتونو له امامانو هم وغوښتل چې د پنځه وقته او جمعې لمانځه د آذان پر مهال له خلکو وغواړي چې خپل لمونځ په کور کې وکړي.

دیني عالم، عبدالسلام عابد په دې ناسته کې وویل چې په داشان شرایطو کې د جګړې ښکیلې خواوې باید اوربند اعلان کړي.

هغه همداراز له حکومت څخه وغوښتل چې د احتکار کوونکو او د خوراکي توکو د ګران پلورونکو مخنیوی وکړي.

له دې سره، که څه هم د کابل ښار نن د ګرځبندیز په لسمه ورځ کې دی، خو د پلازمینې یو شمیر برخې د هیوادوالو د تګ را تګ شاهدې وې؛ د سرای شمالي بازار او کوتې سنګي هغه سیمې دي چې ګڼه ګوڼه پکې ډيره ده.

خو په کور کې د پاتې کیدو لپاره د حکومت سپارښتنو ته د هیوادوالو نه پاملرنه، د کابل د سیمه ییزې ادارې له غبرګون سره مخ شوه.

د کابل والي، محمدیعقوف حیدري رسنیو ته وویل، چې وروسته له دې، امنیتي سرتیري به له سرغړاوونکو سره قانوني چلند وکړي او همداراز هغوی به د قانون له مخې جریمه کړي.

حکومت د تیرې اوونۍ له پیلنۍ په کابل کې رخصتي اعلان کړه او د کرونا ویروس د مخنیوي لپاره یې په پلازمینه کې د قرنطین خب رورکړ.