د جرګې د مرکچي پلاوي یو غړي د ښاغلي عبدالله په حواله ویلي چې د ملي ګټو په موخه هره پریکړه، د عبدالله عبدالله لپاره د منلو ده.

 

ولسي جرګې د ټاکنو له کبله د سیاسي ناندرو د هواري لپاره خپلې عملي هڅې پیل کړې. د جرګې مرکچي پلاوي، په لومړي ګام کې تیر ماښام (دوه نۍ، مارچ ۳۰)، له عبدالله عبدالله سره لیدلي دي.

د سیاسي ناندرو د هواري لپاره د جرګې د ځانګړي پلاوي یو غړي، حجت الله خردمند، آرزو ته ویلي چې ښاغلي عبدالله منلې چې د ملي ګټو لپاره پریکړه کوي.

د ښاغلي خردمند په وینا، عبدالله عبدالله ټینګار کړی، د سیاسي ناندرو د هواري لپاره د ملي ګټو پر بنسټ هره هغه پریکړه چې د جرګې د ځانګړي پلاوي لخوا وشي، ورته د منلو ده.

تمه ده د سیاسي ناندرو د هواري لپاره دا پلاوی، ډیر ژر له محمد اشرف غني سره هم وویني او وروسته له رامنځته شوي سیاسي کړکیچ څخه د بهر تلو لپاره خپله طرحه شریکه کړي.

تیره ورځ د ولسمشرۍ ماڼۍ سلاکار وویل چې اوس مهال، د حکومت د سیاسي مشرانو ترمنځ د نوي حکومت د جوړیدو پر سر خبرې روانې دي.

د عبدالله عبدالله ویاند، محمد امید میثم هم آرزو ټلویزیون ته ویلي چې د محمد اشرف غني او عبدالله عبدالله ترمنځ سیاسي خبرو ښه پرمختګ لرلی دی.

د هغه په وینا، د سیاسي هوکړې لپاره د دواړو لوریو ترمنځ لیوالتیا هم ډیره شوې ده.

له دې سره سم، د امریکا د بهرنیو اچرو وزارت په یوې اعلانپاڼه کې لیکلي چې مایک پامپیو د ناټو له لوی منشي سره د افغانستان د سیاسي حالت اړوند تلفوني خبرې کړي؛ دواړو لوریو ټینګار کړی چې په افغانستان کې د سیاسي هوکړې په پایله کې د ټول شموله حکومت جوړیدل یوه اړتیا ده.

آرزو نیوز- شمس الرحمن خپلواک