وروسته له هغه چې ولسمشرۍ ماڼۍ د اجرايي ریاست د لغوه کیدو امر وکړ، عبدالله عبدالله د اشرف غني فرمانونه بې اعتباره بللي دي.

ولسمشر غني نن له غرمې وروسته (څلورنۍ، د کب ۲۱)، د یوه فرمان صادرولو سره، اجرایي ریاست لغوه کړ.

د دې فرمان پر بنسټ، وروسته له دې د اجرایي ریاست هیڅ مکتوب د اجرا وړ ندی او د دې بنسټ کارکوونکي د اداري سمون د کمیسیون له لارې نورو بنسټونو کې جذبیږي.

په دې فرمان کې همداشان راغلي چې د رجال برجسته اداره، نور د دې بنسټ د ساتنې پازه نلري.

د ولسمشر ویاند، صدیق صدیقي هم نن (څلورنۍ، د کب ۲۱)، په یوې خبري ناسته کې وویل چې وروسته له دې اجرايي ریاست شتون نلري.

خو د ولسمشر د دې فرمان وروسته، عبدالله عبدالله په یوې اعلانپاڼه کې ویلي چې د ملي یووالي د حکومت عمر پایته رسیدلی او محمد اشرف غني یې هم د مخکیني ولسمشر په توګه یاد کړی دی.

ښاغلي عبدالله زیاته کړې: “د ملي یووالي د حکومت مخکینی ولسمشر، محمد اشرف غني، نور ولسمشر ندی او د هغه فرمانونه او احکام بې اعتباره دي.”

په دې اعلانپاڼه کې همداشان راغلي: “د مخکیني اجرايي ریاست ټولو ملکي او پوځي کارکوونکو ته سپارښتنه کوو چې د تیر په څیر خپلو ورځنیو دندو او مسوولیتونو ته دوام ورکړي.”