طالبانو د امریکا د بهرنیو چارو وزیر د څرګندونو پر غبرګون کې ویلي چې دا ډله د ستونزو د هواري هوډ او وړتیا لري.

د طالبانو د ډلې ویاند ذبیح الله مجاهد د امریکا د بهرنیو چارو وزیر مایک پامپیو، د تیرې ورځې د څرګندونو په غبرګون په خپله تویټر پاڼه لیکلي، چې د خبرو اترو بهیر د امریکا پرله پسې غوښتنو او په کابل او واشنګټن کې د مسوولینو د اختلاف له کبله له ستونزو سره مخامخ شوی.

د امریکا د بهرنیو چارو وزیر د درې نۍ په ورځ (د سلواغې ۱۵/ د فبروروي ۴ ) په تاشکنت کې له خپل اوزبیکستاني سیال سره په یوه ګډه خبري ناسته کې ویلي چې طالبانو د دې وس نه درلود چې د تاوتریخوالي د کمیدو په اړه خپله لیوالتیا او وړتیا وښایي. مونږ له طالبانو غواړو چې دا ثابته کړي چې د تاوترخوالي د کمیدو لپاره لیوالتیا او وړتیا لري.

دا څرګندونې په داسې حال کې کیږي چې د افغانستان د سولې لپاره د امریکا ځانګړي استازي زلمي خلیلزاد، درې ورځې وړاندې په کابل کې ویلي وو چې له طالبانو سره خبرو اترو د پام وړ پرمختک نه دی لرلی. ښاغلي خلیلزاد د طالبانو له خوا د اوربند او د تاوتریخوالي د کمیدو په اړه د روښانه ځواب غوښتنه وکړه.

آرزو نیوز – نجلا مایار