له طالبانو سره د امریکا خبرو اترو له تودیدو سره هم مهاله،ایران د افغانستان د سولې په بهیر کې د بهرنیو په نه لاس وهنې ټینګار کوي.

د یران د بهرنیو چارو وزیر جواد ظریف له آنادولې خبري آژانس سره په مرکه کې ویلي دي چې د افغانستان خلک باید په خپله د خپل هیواد راتلونکې په اړه پریکړه وکړي.

جواد ظریف وویل:په افغانستان کې د لوبې پای د افغانانو ،طالبانو او د افغانستان  د حکومت په لاس کې ده.د افغانستان ټول ځواکونه باید یو ځای شي او د بهرنیو له لاس وهنې پرته،د خپلې راتلونکې په اړه پریکړه وکړي.د سیمې هیوادونه باید د افغانستان د سولې په بهیر کې آسانتیا رامنځته کړي،هڅه ونه کړو سپارښتنه وکړو او یا هم زمونږ له سیمې بهر هیوادونه هم نباید سپارښتنه وکړي.

د ایران د بهرنیو چارو وزیر همدا شان تهران ته د طالبانو وروستي سفر ته هم ګوتڅنډنه وکړه.

ښاغلي ظریف زیاته کړه:ایران ټول افغانان هڅوي ترڅو په خپلو کې د یوې سوله ییزې حل لارې موندلو لپاره کیني.مونږ له طالبانو سره په خبرو اترو کې هم په همدې سکالې تمرکز درلود،طالبانو ویلي دي چې له مونږ سره په دې برخه کې موافق دي.

د طالبانو د ډلې یو شمیر مخکیني غړي ټینګار کوي چې تر هغې چې د طالبانو او امریکا تر منځ هوکړه لیک لاسلیک نشي،دا ډله به د افغانانو ترمنځ خبرو اترو ته حاضره نشي.

له دې ټولو سره د ایران د بهرنیو چارو وزیر د استانبول ناستې په څنډه کې له ولسمشرغني سره ویلي دي چې د افغانستان حکومت باید د راتلونکو خبرو اترو مشري پر غاړه ولري او تهران د تیرو لاسته راوړنو د ساتنې او جګړو د پای غوښتونکی دی.