په هیواد کې د بزګر ملي ورځ په پلازمینه کې د معیاري تولید او سوداګریزې کرنې په نوم نندارتون جوړیدو سره ونمانځل شوه.

 

د کرنې، اوبو لګونې او مالدارۍ وزیر، انورالحق احدي تیر کال د هیواد د بزګرانو لپاره له ستونزو سره سره له لاسته راوړنو ډک وباله، خو په را روانو کلونو کې یې د وچکالیو د اټکل اړوند اندیښنه وښوده.

له بلې خوا په دې نندارتون کې د صنعت او سوداګرۍ وزیر، نثاراحمد غوریاني فیضي وویل چې افغانستان په تیر کال کې نږدې ۸۹۰ میلیونه افغانۍ صادرات لرلي چې د دې صادراتو لویه برخه، کرنیز پیداوار دي.

په همدې حال کې کروندګر او د نندارتون ګډونوال له هیوادوالو غواړي چې له کورنیو تولیداتو ګټنه وکړي.

له دې ټولو سره، ولسمشر غني هم د بزګر د ملي ورځې په پار یوه پیغام کې، د کرنې په برخه کې د ښځو د ونډې او فعالیت ډيریدل د کورنیو د اقتصاد د ودې په برخه کې اغیزمن بللی او کرنیزو تولیداتو ته یې په ډیرې بازارموندنې ټینګار کړی دی.