د تخار ولایت بهارک او فاریاب خواجه سبزپوش ولسوالۍ د طالبانو تر کنټرول لاندې ورغلې دي.

له تخار څخه امنیتي سرچینې چې نه غواړي نوم یې واخیستل شي وايي چې د تیرې اوونۍ له پنځه نۍ ورځې طالبانو پر بهارک ولسوالۍ خپل بریدونه ډير کړل، چې په پای کې نن سهار دا ولسوالۍ د دې ډلې تر ولکې لاندې راغله.

د بهارک ولسوالۍ له سقوط سره دا د تخار دویمه ولسوالۍ ده چې د لسو ورځ په لړ کې د طالبانو لاسته ورځي.

په همدې حال کې، دفاریاب د ولایتي شورا یو شمیر غړي وايي چې د دې ولایت خواجه سبزپوش ولسوالۍ هم د طالبانو لاسته لویدلې ده.

دوی ټینګار لري چې د دې ولسوالۍ د پولیسو مشر کل اختیار عرب هم له خپلو ۱۳ ملګرو سره تیره ورځ دې ډلې ته تسلیم شول.

د فاریاب د ولایتي شورا غړی آقا محمد نوري هم واويي چې طالبان د خواجه سبز پوش ولسوالۍ په ولکه کولو سره د میمنې ښار تر ورونو رسیدلي او د ښار مرکز هم د دې ډلې د بریدونو تر ګواښ لاندې دی.

تر اوسه امنیتي پازوال د دې دوو ولسوالۍ د سقوط په اړه څه نه دي ویلي.

له قیصار، المار، دولت آباد او شیرین تګاب ولسوالیو وروسته خواجه سبزپوش پنځمه ولسوالۍ ده چې د طالبانو لاسته لویږي.