محمد اشرف غني د ترکیې د بهرنیو چارو له وزیر، مولود چاووش اوغلو سره د مونیخ امنیتي کنفرانس په څنډه کې ولیدل او په اقتصادي، امنیتي سکالو او د سولې د بهیر اړوند یې خبرې وکړې.

په دې لیدنه کې ښاغلي غني وویل چې افغانستان په سیمه کې د اقتصادي څلورلارې په توګه، د سیمې، منځنۍ آسیا او ترکیې هیوادونو سره د سوداګریزو او ترانزیټي اړیکو غوښتونکی دی.

ولسمشر همداشان زیاته کړه، چې د افغانستان د امنیت د ټینګښت به موخه د ترکیې هڅې کولای شي ګټورې و اوسي او له ترهګرۍ سره د مبارزې په برخه کې د ناټو د غوڅ ملاتړ د ماموریت په څوکاټ کې د دې هیواد ونډه مهمه ده او مونږ د افغانستان له امنیتي او دفاعي سرتیرو د ترکیې ملاتړ ته اړتیا لرو.

مولود چاووش اوغلو ټینګار وکړ چې هیواد یې چمتو دی چې د پرمختیا په برخه کې له افغانستان سره مرسته وکړه او د افغانستان له امنیتي سرتیرو هم ملاتړ ته دوام ورکوي او تر هغه چې اړتیا وي، د ترکیې پوځي سرتیري په افغانستان کې پاتې کیږي.

ښاغلي اوغلو همداشان خوشبیني وښوده چې د خبرو اترو روان بهیر، په افغانستان کې د جګړې او تاوتریخوالي د پایته رسیدو لامل وګرځي.