د تاجیکستان ولسمشر له عبدالله عبدالله سره په لیدنه کې ویلي چې په افغانستان کې ټیکاو په سیمه کې د امنیت په معنا دی.

 

د ملي روغې جوړې د لویې شورا مشر چې پرون د تاجیکستان پلازمینې، دوشنبې ته ورسید؛ نن (درې نۍ، مرغومې۲)، د تاجیکستان له ولسمشر، امام علي رحمان سره ولیدل.

امام علي رحمان ویلي: افغانستان، تاجیکستان او سیمه له ترهګرۍ، افراطپالنې او نه ټیکاو څخه زیانمن شوي. په افغانستان کې د سولې او ټیکاو ټینګښت د دواړو هیوادونو او سیمې ترمنځ د سوداګرۍ او ټرانزیټ پراختیا او سویلي آسیا ته د مرکزي آسیا د نښلیدنو زمینه برابروي.

عبدالله عبدالله همداراز ویلي چې د تاجیکستان دولت په افغانستان کې د سولې له هڅو او په دې برخه کې د افغانستان دولت له پریکړو ملاتړ کړی دی.

په وروستیو میاشتو کې، لوړپوړو حکومتي چارواکو د سیمې هیوادونو ته ډیر سفرونه لرلي دي او حکومت د دې سفرونو موخه د سولې له بهیر څخه د سیمه ییزې ټلوالې پیاوړتیا په ګوته کړې ده.

له دې سره هم مهاله، د ملي امنیت شورا سلاکار له آذربایجان څخه ایران ته تللی دی.

د ملي امنیت شورا ویاند، رحمت الله اندړ وویل چې ښاغلي محب له ایراني چارواکو سره په لیدنه کې د افغانستان د حالت اړوند سلاوې کړې دي.

یو شمیر رسنیو د حمدالله محب په حواله لیکلي چې د افغانستان دولت د خبرو په میز کې د طالبانو ډلې د ډیرغوښتنې پر وړاندې دریدلی دی.

اوس مهال د افغانستان دولت او د طالبانو ډلې مرکچي پلاوي په ۲۳ورځینیو رخصتیو کې دي.

د افغانستان دولت د مرکچي پلاوي غړي، غلام فاروق مجروح وویل چې د افغانستان دولت پلاوی، د حکومت له مشرتابه او سیاسي بهیرونو سره د خبرو د دویم پړاو اړوند په سلاوو بوخت دی.

د افغانستان دولت مرکچي پلاوي تراوسه له ولسمشر او د ملي روغې جوړې د لویې شورا له مشر سره لیدلي او تمه ده چې د همدې اوونۍ د پنځنۍ په ورځ یو ځل بیا د ملي روغې جوړې د لویې شورا ناسته وشي.

تر ټولو مهم ټکی چې تمه ده د خبرو د دویم پړاو د پیل مخکې پرې بحث وشي، د دې پړاو خبرو ځای دی. مخکې له دې ولسمشر غني په هیواد کې دننه د خبرو د دوام غوښتنه کړې وه.