د سولې د مشورتي جرګې د امنیتي کمیسیون د اعلانپاڼې پرخلاف، د کابل د عمومي واټونو تړل کیدو، د پلازمینې د اوسیدونکو جدي نیوکې له ځانه سره لرلي دي.

 

له دوو ورځو راپدیخوا د کابل ښار د لویې جرګې په تالار کې د مشورتي لویې جرګې د ترسره کیدو له کبله، پوځي رنګ غوره کړی او د موټرونو او وسایطو په تګ را تګ هم جدي بندیز لګیدلی.

فهیم د کابل اوسیدونکی دی. ده آرزو ټلویزیون ته ووییل چې د امنیتي سرتیرو له لورې د واټونو تړل کیدل د دې لامل شوي چې ګڼ کیلومټره پلې مزل وکړي او د حکومت دې کار دوی ته ډیرې ستونزې رامنځته کړې دي.

فهیم، د کابل اوسیدونکی

مخکې له دې د سولې د مشورتي جرګې امنیتي کمیسیون د کوته سنګي، قمبر څلورلارې او د کارته پروان څلورلارې چې د لویې جرګې کیږدۍ ته لار لري، د هغو درییو لارو په توګه مشخصې کړې چې د دې ناستې ترپایه به تړلې وي.

د پلازمینې یو شمیر اوسیدونکي وایي چې دې کمیسیون د خپلو ژمنو پرخلاف، ډیر واټونه تړلي، حتې د کابل ښار  تر ورونو، یو شمیر واټونه د امنیتي بنسټونو له لورې تړل شوي او دې کار، ډیرې ناروغان په بد حالت کې پرې ایښي.

د کابل اوسیدونکي همداراز تلپاتې سولې ته د رسیدو لپاره د حکومت برنامه، ناسنجول شوې بولي.

په همدې حال کې، د سولې د مشورتي لویې جرګې ترسره کوونکی کمیسیون وایي، چې جدي امنیتي ګواښونو دوی اړ کړي چې د ښار په ډیریو برخو کې جدي او ځانګړې تابیاوې ونیسي.

د سولې د مشورتي لویې جرګط د کمیسیون د عامه اړیکو غړي، محمد حیدري وویل چې تمه ده د لیږدوونکو وسایطو په تګ را تګ بندیز یوه بله ورځ هم دوام ولري.

د سولې د لویې جرګې د کمیسیون پازوال په وینا، تر سبا به د دې جرګې کار پایته ورسیږي.