د صنعت او سوداګرۍ وزیر، نثاراحمد غوریاني د نبي زاده شرکتونو او نبي زاده مرستندویه بنسټ له مشر کمال نبي زاده سره په لیدنه کې، د سوداګرۍ د ودې او له منځنۍ آسیا او روسیې سره د تولیدي توکو د صادراتو د ډیریدو پر سر خبرې کړې دي.

 

د صنعت او سوداګرۍ وزیر په دې لیدنه کې ویلي چې ښاغلی نبي زاغده د منځنۍ آسیا او روسیې له سوداګریز حالته ښه پيژندنه لري او کولای شي د سوداګرۍ د ودې او دې هیوادونو ته د هیواد د تولیدي پیداوارو د صادارتو په برخه کې ښه ونډه ولوبوي.

هغه همداراز له ښاغلي نبي زاده څخه د سوداګرۍ د ودې او د ګډو پانګونو د جذب لپاره د منځنۍ آسیا له پانګه والو سره د افغانستان د صنعتګرو او سوداګرو د خبرو د زمینې د برابریدو غوښتنه کړې ده.

له بلې خوا، ښاغلي نبي زاده، منځنۍ آسیا او روسیه د هیواد د تولیدي پیداوارو لپاره ښه بازار بللی او دې هیوادونو ته یې د افغانستان تولیدي محصولاتو د صادراتو د ډیریدو او سوداګرۍ ودې د زمینې د برابرولو لپاره د چمتووالي اعلان کړی.

دواړو لوریو همداراز د صادراتو د ډیریدو او د منځنۍ آسیا هیوادونو او روسیې سره د افغانستان د صوداګرۍ د ډیریدو اړوند د ګډو همکاریو ژمنه کړې ده.