ولسمشر غني یوځل بیا د غور د اوسیدونکو غوښتنو ته په رسیدنې ټینګار کړی.

ښاغلي غني په یوه ویډیویي کنفرانس کې ویلي دي چې د مالیې او ټرانسپوړت وزارتونه مسوولیت لري ترڅو د غور ۴۰ کیلومټره واټ جوړیدو تدارکاتي چارو ته چټکتیا ورکړي او د دې ولایت پنځه میګاواټه لمریزې بریښنا په اړه هم لاس په کار شي.

په دې انځوریز کنفرانس کې، د غور ولایت اوسیدونکو د هرات-غور د واټ د بیارغاونې، په دې ولایت کې د میشتو امنیتي او دفاعي سرتیرو د جوړښت د پیاوړتیا او د دولت د مخالفینو پر وړاندې د عملیاتو د دوام غوښتنه کړې ده.

ولسمشرهمدا شان ټينګار کړی دی چې د بریښنا ملي شبکو سره د غور نښلیدل، د حکومت له موخو څخه ده، او وارداتي بریښنا هم په چټکۍ سره د پراختیا په حال کې ده چې د غور او فراه ولایتونه هم په کې شامل دي.

ښاغلي غني وویل:  ”د فیروزکوه ښار د څښاک د اوبو پروژه چې نهه کیلومتره ده، تر لاس لاندې ده او ګټې اخیستې ته سپارل کیدو سره به یې ۷۲۰۰ کورنۍ د څښاک له پاکو اوبو برخه منې شي او د اوبو ګرځولو بندونو د مدیریت، د سیندغاړو د تحکیم، د غور کرنیزو پیداوارو او په تیره بیا وړۍ او غوښې لپاره د بازارموندنې په برخه کې به پاملرنه وشي. “

آرزو نیوز – نجلا مایار