د اشرف غني او عبدالله عبدالله د لوړې د هم مهاله مراسمو یوه ورځ وروسته، د کابل ښار لا هم پوځي څهره لري.

کابل د دوو ورځو راپدیخوا پوځي څهره غوره کړې، خو د دې حالت دوام، د کابل د اوسیدونکو ویره ډیره کړې ده.

د کابل یو شمیر اوسیدونکي وایي چې د حکومت د مشرانو د لوړې د مراسمو یوه ورځ وروسته، د ښار مرکز ته تلونکې لارې تړلې دي او په ډيریو برخو کې، ښاري وسایطو ته د تګ را تګ اجازه نه ورکول کیږي.

وحید په کابل ښار کې موټر چلوونکی دی. هغه د آرزو ټلویزیون خبریالې، لیدا نوروزي ته وویل چې د ښار د واټونو تړل کیدل د دې لامل شوي چې د دوییمې پر له پسې ورځې لپاره، له ۲۰۰ افغانیو لږ عاید یې لرلی دی.

موټر چلوونکی وحید، او د آرزو خبریاله لیدا نوروزي

د کابل ښار دا اوسیدونکی، د حکومت مشران د عادي هیوادوالو د ژوندانه د ستونزمنولو اصلي پړ بولي او د خبرو له لارې د ناندرو په هواري ټینګار کوي.

رامنځته شوې سیاسي ناندریو، مخکې ل دې هم د یو شمیر ټاکنیزو نوماندانو او سیاسیونو نیوکې له ځانه سره لرلي دي.

د سیاسي چارو شنونکی، رحمت الله بيژنپور وایي چې د واک پر سر د ولسمشرۍ ماڼۍ او اجرایي ریاست ترمنځ وروستۍ ناندرې به،  د اوسني نظام د پاشل کیدو لامل وګرځي.

هغه همداشان د ناندرو له ښکیلو خواوو وغوښتل چې ژر تر ژره د خبرو له لارې رامنځته شوېو لانجو ته د پای ټکی کیږدي.

له دې ټولو سره، تیره ورځ افغانستان په خپل تاریخ کې د لومړي ځل لپاره، د لوړې د دوو هم مهاله مراسمو شاهد وو.