د امریکا د بهرنیو چارو وزیر مایک پامپیو، د افغانستان د حکومت له لورې د مرکچي پلاوي له جوړیدو هرکلی کړی دی.

ښاغلي پامپیو په خپله تویټر پاڼه لیکلي: ”له خپلو افغان ملګرو څخه د  افغانانو تر منځ د خبرو اترو د بریالي کیدلو لپاره د یوه هر اړخیز مرکچي پلاوي له چمتو کیدلو مننه کوم. زه همداشان د سولې او جوړجاري لپاره د زمینې برابرولو او د بندیانو د خوشی کولو لپاره ستاسو له هڅو ستاینه کوم. ”

ښاغلي پامپیو همداراز په افغانستان کې د ټول شموله حکومت د جوړیدو غوښتنه وکړه.

ده زیاته کړه: ” له تاسې غواړم چې د یوه ټول شموله حکومت د جوړیدو لپاره د هڅو ورته ژمنه وښایئ. دا ګام د نورو تیرو پریکړو په څیر کولې شي چې له ټولو افغانانو سره د یو روښانه راتلونکي د رښتیني کیدو په برخه کې مرسته وکړي.”