د ملي روغې جوړې لویې شورا د چمتو کولو او توحید کمېټې نن یوه نۍ (وري پنځلسمه)، د سولې اړوند طرحو او لیدلورو یوشان کیدو په موخه یوه ناسته ترسره کړه.

 

د ملي روغې جوړې د لویې شورا ویاند، فریدون خوځون وویل چې دې کمېټې د سیاسي ګوندونو، د ملي روغې جوړې د لویې شورا د مشرتابه کمیټې د  غړو او د هیوادوالو د لیدلوریو د راټولولو او یووالي پر سر کار کړی او د ټولو لیدلوریو د یووالي وروسته به هغه د ملي روغې جوړې ټولیزې غونډې ته وړاندې کړي.

د ملي روغې جوړې د لویې شورا د خبرپاڼې پر بنسټ، تراوسه ۲۵ سیاسي ګوندونو او روغې جوړې شورا غړو خپل لیدلوري دې شورا ته سپارلي چې ټول یې ۳۰ طرحې دي.

له دې سره یو شمیر پوهان د استانبول د راتلونکې ناستې او سولې اړوند د طرحو له ډیروالي اندیښنه څرګندوي.

له دې سره هم مهاله د مشرناو جرګې یو شمیر غړو هم په نننۍ ناسته کې، د سولې او د هیواد د راتلونکي په تړاو د بیلابیلو طرحو له وړاندې کیدو اندیښنه وښوده او د سیاستوالو د لیدلوریو د یووالي غوښتنه یې وکړه.