د هرات په اسلام قلعې ګمرک کې له اورلګیدنې خپاره شوي انځورونه او ویډیوګانې، د اور د لمن د غځیدو او له سیمې د خلکو تیښته ښایي.

 

دا پیښه نن له غرمې (پیلنې، سلواغې۲۵)، وروسته پيښه شوه.

د هرات والي، سید عبدالوحید قتالی، رسنیو ته وویل چې دې پیښې پراخ مالي تاوان اړولی دی. د هغه به وینا، د ایرنا اوروژونکي وسایط، مرزي کرښې ته رسیدلي دي.

ښاغلي قتالي همداراز د کالیو د ساتنې او له سیمې د وسایطو د لرې کولو په برخه کې د سوداګرو د مرستې غوښتونکی شو.

د ګزارشونو پر بنسټ؛ تراوسه د دې اورلګیدنې به پایله کې له لسو تنو ډیر وګړي ټپیان شوي دي.

د هرات د عامې روغتیا ریاست ویاند، محمدرفیق شیرزي آرزو ټلویزیون ته وویل چې تراوسه اووه ټپیان د هرات حوزوي روغتون ته لیږدول شوي دي.

د سیمه ییزو چارواکو په وینا، د اورلګیدنې د پراختیا له کبله، له ایران هیواد څخه د همکارۍ غوښتنه شوې او د دې هیواد اوروژونکې ډله هم لاس په کار شوې ده.

د دې اورلګیدنې په لړ کې، د بریښنا شرکت هرات ته د ایران وارداتي بریښنا د پرې کیدو خبر ورکړی دی.