د هند لخوا د کرونا ویروس جوړ شوي واکسین د مرستو لومړنۍ جوپه، نن (یوه نۍ، سلواغې نولسمه)، کابل ته راورسیده.

 

دا جوپه چې د دې واکسین ۵۰۰زره ډوزه په کې شامل دي، ۲۵۰زره تنه به پرې واکسین شي.

په کابل کې د هند سفارت چارسمبالي، راګورام د عامې روغتیا وزارت چارواکو ته د دې هیواد د مرستو د جوپې د سپارلو پرمهال، له کابل سره د نوې ډهلي د همکاریو د دوام ډاډ ورکړ.

هغه یاده کړه: “مونږ د همکاریو اوږدمهاله تاریخ لرو. هند او افغانستان په ښو او بدو ورځو کې د یوه بل ترڅنګ دریدلي دي. نن ډیر خوښ یم چې د کرونا واکسین لومړنۍ جوپه له هند څخه کابل ته رارسیدلی ده.“

په همدې حال کې د عامې روغتیا وزارت واکپال، وحید مجروح وایي چې د هند له لورې د کرونا جوړ شوی واکسین د روغتیا د نړیوال سازمان تصدیق ندی ترلاسه کړی.

د هغه په وینا، تر لسو ورځو به د دې واکسین د ګټنې اړوند د روغتیا نړیوال سازمان ځواب روښانه شي او تر هغه مهاله به، په افغانستان کې له دې مرستې ګټنه ونشي.

د عامې روغتیا وزارت د لومړیتوبونو پر بنسټ، تمه ده لومړی روغتیاپالان او امنیتي سرتیري له دې واکسین څخه برخه من شي.

د روغتیا وزارت د معلوماتو پر بنسټ، د کرونا ویروس له خپریدو تراوسه په افغانستان کې له ۵۵ زرو ډیر وګړي په دې ویروس اخته شوي او دوه زره او ۴۱۳ تنو هم له دې کبله خپل ژوند له لاسه ورکړی دی.

په تیرو څلورویشتو ګړیو کې هم، په هیواد کې ۲۴ تنه په دې ویروس اخته شوي او درییو تنو خپل ژوند له لاسه ورکړی.