د هیواد نامتو او وتلي سندرغاړي عبدالله مقري د کرونا نا روغۍ له کبله خپل ژوند له لاسه ورکړی دی.

د ښاغلي مقري زوی میرخان په خپله فیسبوک پاڼه کې د هغه مړینه تایید کړې او ویلي یې دي چې هغه څو ورځې د نا روغۍ به بستر کې وو چې نن سهار یې په روغتون کې سا ورکړې ده.

ولسمشرغني هم په یوه پیغام سره د ښاغلي مقري په مړینې خواشیني ښودلې ده.

له ارګ څخه په خپره شوې اعلانپاڼه کې راغلي دي چې:  هغه (عبدالله مقر) پر وطن، وطنوالو، ژوند او هنر مئین ملي ، وطنپاله او حماسي سندر غاړی وو او د هغه مړینه د هنر په برخه کې ستره ضایعه ده.

له بلې خوا د اطلاعاتو او فرهنګ وزارت هم په جلا پیغام کې د عبدالله مقري مړینه ستره ضایعه بللې او ویلي یې دي چې عبدالله مقري په شپېتمو کلونو کې د موسیقۍ هنر ته مخه کړه او د ځانګړي استعداد او ذوق او همدارنګه نه ستومانېدونکو هڅو په برکت یې ډېر ژر شهرت او محبوبیت وموند. ده په خپلو سندرو کې د جګړه ځپلي افغانستان او افغانانو دردونه او کړاوونه بیانول او په هره وطني او حماسي سندره او ترانه کې یې له ولس او هېواد سره مینې انګازې کولې.

په خواله رسنیو کې هم افغانانو د ښاغلي مقري په مړینه خواشيني ښودلې او هغه یې یو وطنپاله او پر ولس مین کس بللی دی.

مقري تر ډېره حماسي یا د وطن په یاد سندرې ویلي. تر ټوله مشهوره یې (دا د آزادۍ خاوره دا جګو غرو وطن) ترانه ده چې ښايي لږ شمېر افغانانو نه یې زمزمه کړې.

عبدالله مقری د عبیدالله مقري زوی او د غزني ولایت د مقر ولسوالۍ د کوچالو کلي اوسیدونکی وو.