د پکتیا د ولایتي شورا یو شمیر غړي وایي پکتیا د ولایتي شورا مرستیال ایوب غروال نن سهار ( د وږې/سنبلې ۲۹، سپټمبر ۱۹) په ګردیز ښار کې د ناپيژانده وسله والو کسانو په برید کې ووژل شو.

د راپورونو پربنسټ ، ښاغلی غروال په دې پیښه کې لومړی ټپي او وروسته یې په روغتون کې سا ورکړې ده.

له بلې خوا ولسمشرۍ ماڼۍ د دې برید په غندلو سره ویلي دي چې ولسمشرغني اړوندو ارګانونو ته د پېښې د هر اړخیزې ارزونې او د عاملینو د تشخیص او مجازات په اړه لارښوونه وکړه او په ټینګار سره یې وویل، د تروریستانو او جنایتکارو پر وړاندې به زموږ د امنیتي او دفاعي ځواکونو مبارزه ادامه ولري.

د دې پیښې پړه تر اوسه کومې ډلې پر غاړه نه ده اخیستې.