د کابل- غزني د لویې لارې یو شمیر مسافرین، له حکومت څخه د لویو لارو د امنیت د ټینګښت غوښتنه لري.

 

تیره دوه نۍ، ناڅرګندو وسله والو د غزني ولایت د اندړ ولسوالۍ د ملا نوح بابا په سیمه کې د مسافرینو موټر درولی او د هغو پیسې او قیمتي توکي یې له ځانه سره وړي.

د کابل-کندهار لویې لارې یو شمیر مسافرین، په دې لاره کې له ناکراریو او وسله والو غلاوو شکایت لري او وایي چې دا کسان تل د پلټنځایونو جوړولو سره، د دوی توکي له ځانه سره وړي.

دوی له حکومت څخه غواړي چې د امنیت د ټینګښت ترڅنګ، د دې پيښې عاملین هم ونیسي.

د غزني د ولایتي شورا مشر، نصیر احمد فقیري هم رسنیو ته د دې پخلی کړی چې وسله والو غلو د ګڼو مسافر وړونکو موټرونو درولو سره، د مسافرین توکي غلا کړي.

ښاغلی فقیري ادعا کوي چې وسله والو غلو په یوې نجلۍ هم ډله ییز تیری کړی، خو د دې ښځې د هویت اړوند یې څه ندي ویلي.

په همدې حال کې، د غزني د والي ویاند، واحدالله جمعه زاده، د دې لارې په اوږدو کې په یوې نجلۍ د جنسي تیري ادعا ردوي او دا یوه شایعه بولي.

د غزني د والي ویاند همداراز د دې پيښې د لا څیړلو خبر ورکوي.

که څه هم سیمه ییز پازوال، د طالبانو جنګیالي د کابل-کندهار د لویې لارې د مسافرینو د ځورونې عامل ګڼي، خو طالبانو دا ادعاوې رد کړي.