د باروړونکو موټرونو یو شمیر چلوونکي وایي چې د ناقانونه پيسو د نه ورکړې په صورت کې، د پولیسو له لورې وهل او ټکول کیږي.

 

د کابل-کندهار د لویې لارې د باروړونکو موټر چلوونکو، مخکې له دې هم د هیواد په لویو لارو کې د ناقانونه پيسو اخیستلو له کبله کاري اعتصاب کړی وو.

کریم الله د کابل-کندهار لویې لارې له موټر چلوونکو څخه دی، چې ادعا کوي، د ناقانونه پیسو د نه ورکړې له کبله په دې لویه لاره کې د پولیسو له لورې وهل او ټکول شوی دی.

د کریم الله په وینا، د ناکراریو ترڅنګ، د پولیسو له لورې ناقانونه پيسو اخیستو، په دې لاره کې موټر چلوونکو ته جدي ستونزې زیږولې دي.

د ګزارشونو پر بنسټ، د زابل په شهرصفا او نورک سیمو کې، کله چې موټر چلوونکو پولیسو ته څو ځلي پيسې ندي ورکړي، وژل شوي یا هم ټپي شوي دي.

په همدې حال کې، د زابل د پولیسو مشر، محمد ویس صمیمي په دې وروستیو کې د هغو امنیتي سرتیرو د نیول کیدو خبر ورکوي چې په یادو سیمو کې یې له موټر چلوونکو پيسې اخستې.

د زابل د پولیسو مشر ټینګار لري چې د دې مامورینو پرځای، نوي کسان ګومارل شوي دي.

له دې سره هم مهاله، د زابل والي، احمدګل رسولي آرزو ټلویزیون ته وایي چې د پولیسو سرتیرو په لیکو کې د سمون راوستل د ده کاري لومړیتوب دی، او د موټر چلوونکو شکایتونو ته به رسیدنه وکړي.

د زابل-کندهار لویه لار، ۴۸۳ کیلومتره اوږدوالی لري او په هیواد کې د ځمکني ټرانسپورټ له مهمو لارو شمیرل کیږي. خو په دې لاره موټر چلوونکي تل له ناقانونه پيسو اخیستو، ناکراریو او د دولت د وسله والو مخالفینو د حضور له کبله شکایت لري او حتی څو ځلي یې کاري اعتصاب هم کړی دی.