د کندز سیمه ییز پازوال وایي چې له اوزبیکستان څخه پيرل شوي ماشینونه، اوس مهال کندز ته رسیدلي او د نویو وسایلو نښلیدو سره، دا کارخونه به په ورځ کې د لس ټنو غوړیدو د تولید وړتیا ولری.

 

د افغانستان او اوزبیکستان ترمنځ د هوکړه لیک پر بنسټ، د کندز د سپین زر کارخونې د فعالیت د بیا پیلیدو په موخه، پنځه نوي ماشینونه دې ولایت ته لیږدول شوي دی.

د کندز د سپین زر تصدۍ مشر، ذبیح الله زاهد وویل چې دا ماشینونه په ۲۴ ګړیو کې به ۱۰ ټنه غوړي تولید کړي.

هغه زیاته کړه، د ۍبین زر تصدۍ په تیرو دوو لسیزو کې فعالیت نه درلود.

د کندز د والي مرستیال، رحمت الله رحیمي غرض بیګي وویل چې د نویو ماشینونونو نښلیدو سره، دا کارخونه به بیا خپلې چارې پیل کړي.

هغه زیاته کړه چې د دې تصدۍ د فعالیت د بیا پیلیدو لپاره مرکزي حکومت له هر اړخیز ملاتړ سره، د خلکو هیله مندي هم ډ‌یره شوې ده.

د دې ماشینونو ارزښت، ۱۲۰زره امریکايي ډالرو ته رسیږي.

آندونه دا دي چې د دې کارخونې فعالیت بیا پیلیدو سره به، ورته وارداتي توکو ته د خلکو اړتیا کچه راټیټه شي.

د کندز د سپین زر کارخونې پخوا د غوړیدو او صابون تولیدات کیدل، خو د کورنیو جګړو په پایله کې ویجاړه شوې وه.