د آزموینې ملي اداره وايي چې د ۱۴۰۰ کال د آزموینې لومړی پړاو، په ۲۵ ولایتونو کې ترسره کیږي.

دې ادارې اعلان کړی دی چې عمومي، متفرقه، دیني علومو مدرسو، ځانګړي او شپني کانکور آزموینه په درییو پړاونو کې د غويي میاشتې له اتمې د دې میاشتې تر لسمې ترسره کیږي.

د آزموینې د ملي ادارې واکپال عبدالقدیر خموش چې نن ( دوه نۍ، غويي ۶مه) د حکومت د رسنیو او اطلاعاتو په مرکز کې په یوې خبري ناسته کې خبرې کولې وویل چې د هیواد په ۲۵ ولایتونو سمنگان، سرپل، غور، نیمروز، بادغیس، فراه، نورستان، پکتیکا، دایکندی، زابل، ارزگان، هلمند، کندهار، بامیان، وردگ، لوگر، پکتیا، خوست، کاپیسا، پنجشیر، لغمان، کنر، پروان، ننگرهار او بغلان کې د آزموینې لومړي  پړاو ترسره کولو لپاره چمتو والی نیول شوی او په دې ولایتونو کې به په کانکور کې د ګډون کوونکو کسانو د بایومټریک بهیر سبا بشپړ شي.

هغه زیاته کړه په دې ولایتونو کې د ټولو ګډون کوونکو کسانو ټولیزه کچه نږدې ۹۰ زره تنو ته رسیږي.

د آزموینې د ملي ادارې د واکپال په وینا، د ۱۴۰۰ کال د کانکور د آزموینې دویم پړاو به د غويي له ۲۶مې پیل او د همدې میاشتې تر ۳۱مې به دوام ولري چې په دې پړاو کې به فاریاب، کندز، جوزجان، غزنی، بلخ، هرات، تخار و پنج حوزه ولایت بدخشان، شامل وي.

د دې ادارې د مالوماتو پربنسټ، د کانکور د آزموینې درییم کابل او د دې ولایت ولسوالیو ته ځانګړی شوی، خو د ترسره کیدو کره نيټه به یې وروسته اعلان شي.

د ۱۴۰۰ لمریز کال په آزموینه کې به، نږدې ۲۰۰ زره کسان ګډون وکړي چې له دې منځه به نږدې ۱۴۳ زره تنه په لوړو زدکړو او نیمه لوړو زدکړو بنسټونو کې جذب شي.