د افغانستان لپاره د آمریکا ځانګړي استازي زلمي خلیل زاد، د ۴۰۰ طالب بندیانو خوشې کیدو اړوند د سولې د مشورتي لویې جرګې له پریکړه لیک او ولسمشرغني له پریکړې هرکلی وکړ.

ښاغلي خلیل زاد په خپله ټویټرپاڼه کې لیکلي دي چې تر څو راتلونکو ورځو د بندیانو د خوشې کیدو لړۍ بشپړیږي او وروسته بیا پلاوی دوحې ته ولاړ شي ترڅو ژر تر ژره د افغانانو ترمنځ خبرې پیل شي.

د افغانستان د سولې لپاره د آمریکا ځانګړی استازی ټینګار کوي چې اوس مهال د سولې لپاره تاریخي فرصت رامنځته شوی چې د افغانانو په ګټه او د سیمې او نړۍ  په ټیکاو کې مرسته کوي.

په همدې حال کې طالبانو ویلي دي چې د ۴۰۰ بندیانو له خوشې کیدو یوه اوونۍ وورسته،د افغانانو ترمنځ خبرو ته چمتو دي.

په قطر کې د طالبانو د سیاسي دفتر ویاند سهیل شاهین بي بي سي ته ویلي دي چې د سولې د مشورتي لویې جرګې له پریکړې هرکلی کوي خو ټینګار یې کړی دی چې په خپله دا جرګه د دوی په آند مشروعیت نه لري.

ولسمشرغني د لویې جرګې په لومړۍ ورځ ویلي وو چې طالبانو ژمنه کړې که چیرې د دې دلې پاتې بندیان خوشې شي، تر درییو ورځو له حکومت سره خبرې اترې پیلوي.

د سولې د مشورتي لویه جرګه، د ۴۰۰ طالب بندیانو خوشې کیدو په اړه د درییو ورځو لپاره په کابل کې ترسره شوه چې د هیواد له ګوډ ګوډ څخه په کې ۳۴۰۰ کسانو ګډون کړی وو.

حکومت د لویې جرګې د پریکړې پر بنسټ،۴۰۰ طالب بندیان خوشې کوي.