د عامې روغتیا وزارت واکپال، احمدجواد عثماني، نن (یوه نۍ، چنګاښ لومړۍ/جون۲۱)، ولایتونو ته د روغتیايي مرستو د ویش په مراسمو کې، خوشبیني وښوده چې په افغانستان کې د کرونا ویروس نزولي بهیر روان دی.

 

د ښاغلي عثماني په وینا، په هیواد کې د کرونا ویروس خپریدل او په دې ویروس اخته کیدل په کمیدو دي.

د عامې روغتیا وزارت همداراز د کرونا ویروس نوې پيښې ثبت کړي چې پر بنسټ یې په تیرو ۲۴ ګړیو کې، په هیواد کې د دې ویروس ۴۰۹ مثبتې پيښې ثبت شوي چې له دې سره په کوویډ-۱۹ د اخته کسانو ټولیز شمیر، ۲۸زره او ۸۳۳ تنو ته ورسید.

د روغتیا وزارت د شمیرنو له مخې، په هیواد کې په کرونا د اخته کسانو له منځه تراوسه ۸زره او ۷۶۴ تنه روغ شوي او ۵۸۱ تنو هم خپل ژوند له لاسه ورکړی دی.

له بلې خوا، له کرونا ویروس سره د مبارزې لپاره د حکومتي برنامو پر دوام، د کابل والي له برښنا شرکت او د اوبو رسولو له بنسټ سره هوکړه لیک لاسلیک کړ چې له مخې یې، د پلازمینې د اړمنو کورنیو د برښنا او اوبو لګښت چې تر زرو افغانیو وي، د دولت له بودیجې ورکول کیږي.

مخکې له دې له اړمنو کورنیو سره د همکارۍ لپاره د حکومت په ناغیړۍ نیوکې شته وې.

له بلې خوا، په دې وروستیو کې په افغانستان کې د ملګرو ملتونو سازمان استازولۍ په یوه ګزارش کې لیکلي چې د کرونا ویروس خپریدو سره هم مهاله، په تیرو درې نیمو میاشتو کې، په افغانستان کې په روغتونونو او روغتیايي مرکزونو پنځلس بریدونه شوي دي.

یوناما د کابل په لویدیځ کې د برچي په ۱۰۰بستریز روغتون د ترهګرو برید ته ګوتڅنډنې سره، داشان بریدونه د خواشینۍ وړ وبللې او د روغتیایي کارکوونکو او روغتیاپالانو موخه ګرځول یې جګړه ییز جنایت په ګوته کړی.