د امریکا د بهرنیو چارو وزارت د زلمي خلیلزاد ماموریت مهم بللی او ویلي چې ښاغلی خلیلزاد به د افغانستان د سولې لپاره د امریکا د ځانګړي استازي په توګه خپل ماموریت ته دوام ورکړي.

 

د امریکا د نوې ادارې منځته راتلو سره، یو بحث د افغانستان د سولې لپاره د امریکا د ځانګړي استازي په توګه د زلمي خلیلزاد پاتې کیدل یا نه پاتې کیدل وو.

د امریکا د بهرنیو چارو وزیر، انتوني بلنکین په خپلې لومړنۍ خبري ناسته کې، دې خبرو ته د پای ټکی کیښود.

هغه ویلي چې امریکا له طالبانو سره لاسلیک شوې هوکړه څیړي او د دې سند تر ارزولو، زلمی خلیلزاد به خپل مهم ماموریت ته دوام ورکړي.

دې ستر امریکايي چارواکي ویلي: یو څیز چې مونږ غواړو وپوهیږو، دا ده چې په رښتیا هم د امریکا متحده ایالتونو او طالبانو ترمنځ په لاسلیک شوي هوکړه لیک کې، څه داسې شته چې دا ډاډ ترلاسه شي چې طالبان په بشپړه توګه د دې هوکړه لیک پر وړاندې په خپلو ژمنو ولاړ پاتې شوي او همداراز مونږ په دې برخه کې څه ژمنه لرلې ده.

خلیلزاد له طالبانو سره د ۱۸ پړاوونو خبرو وروسته، بریالی شو چې دا هوکړه لیک لاسلیک کړي؛ هغه هوکړه لیک چې لا یې هم یو کال ندی بشپړ شوی؛ خو امریکا یې د ارزولو خبر کوي.

د اسلامي حزب د مشرتابه شورا غړی، حفیظ رحمان نقي په دې تړاو آرزو ټلویزیون ته وویل: “د سولې د پایلې ته رسیدو په برخه کې د امریکا سیاست، نه بدلیدونکی سیاست دی. په روان بهیر کې محتوا فرق نه کوي، خو د اجرایي څرنګوالي او پلي کیدو په شکلیاتو کې یې شاید بدلون راشي.”

امریکا په داسې حال کې د خپل ځانګړي استازي د ساتنې پریکړه کوي چې له لسو ورځو راپدیخوا د افغانانو ترمنځ د خبرو بهیر په ټپه دریدلی دی. دا خبرې د امریکا د نوي حکومت د کار له پیل سره هم مهاله له کړکیچ سره مخامخ شوې.

د سیاسي چارو شنونکی، ویس ناصري په دې باور دی چې د سولې بهیر د واشنګټن سیاستونو اټکلیز بدلون له کبله اغیزمن شوی.

د افغانانو ترمنځ د خبرو له پیله نږدې پنځه میاشتې تیریږي. که څه هم له دې بهیر څخه تمه دا وه چې تاوتریخوالی پایته ورسیږي؛ خو لا هم دواړه لوري د جګړې په پایته رسولو ندي بریالي شوی.