د ملي روغې جوړې لویې شورا په یوې اعلانپاڼه کې ویلي چې د دې شورا د سولې د طرحې د چمتو کولو او توحید کمیټې، نن (یوه نۍ، وري۲۲)، د افغانستان د سولې د طرحې مسوده وروستۍ کړې ده.

د دې کمیټې غړو، نن له غرمې وروسته، د سولې د طرحې وروستۍ مسوده د ملي روغې جوړې د لویې شورا مشر، عبدالله عبدالله ته وسپارله.

سبیدار ویلي: “تمه ده چې د افغانستان اسلامي جمهوریت د سولې د طرحې مسوده ډیر ژر د ملي روغې جوړې لویې شورا مشرتابه کمیټې ته د تایید لپاره وړاندې شي.”

د ملي روغې جوړې د لویې شورا په اعلانپاڼه کې راغلي: د سولې د طرحې مسوده، د سولې اړوند د مطرح شویو طرحو د شننې او یووالي وروسته، چمتو شوې چې د جمهوري نظام، ښاروندي حقونو، بشري حقونو، وینا خپلواکۍ، رسنیو، ټاکنو، ملي بنسټونو په ساتنې او پیاوړتیا او د جګړې په پای ټینګار لري.