د ولسمشر لومړي مرستیال، امرالله صالح د اسلام قلعې د اورلګیدنې په پایله کې له زیانمنو سوداګرو سره د همدردۍ ښودلو ترڅنګ، ویلي چې دا پيښه به په ژوره او هراړخیزه توګه وڅیړل شي.

 

ښاغلي صالح نن (یوه نۍ، سلواغې۲۶)، په خپله فیسبوک پاڼه، د افغانستان په بندرونو کې د معیاري بنسټونو نشتون یوه ستونزه بللې او ویلي چې ولسمشر له یوه بهرني شرکت سره د بندرونو د طرحې او ډیزان تړون کړی چې افغانستان وکولای شي خپل ګمرکونه او بندرونه معیاري کړي.

د ولسمشر لومړي مرستیال د دې په ویلو سره چې حکومت په تیرو اتو میاشتو کې، بهرني شرکتونه د افغانستان په ګمرکونو او بندرونو کې پانګونې ته هڅولي دي، زیاته کړې: لږ تر لږه تر ننه یو لوی نړیوال شرکت حاضر شوی چې پانګونه وکړي او ګڼو نورو هیوادونو ژمنه کړې چې په ګمرکونو او بندرونو کې د پانګونې شونتیاوې مطالعه کوي.

هغه د ایران له دولت څخه له اور څخه د خوندي پاتې کیدو لپاره د سوداګریزو توکو سلګونو موټرونو ته د ورتلو له کبله مننه کړې او دا چې د ایران اوروژونکو ډلو په دې اوروژنه کې ونډه اخیستې، ستاینه کړې.