ولسمشر وایي، که طالبان د افغانستان په هر ګوټ کې وغواړي، چمتو دی چې خبرې ترسره کړي؛ حامد کرزی د افغانستان اوسني شرایط د افغانانو ترمنځ د خبرو ترسره کیدو چمتو نه بولي.

 

ولسمشر غني د کابینې په غونډه کې وویل، کله چې طالبان په هیواد کې د حضور ادعا لري، باید د افغانستان په خاوره کې خبرو ته چمتو اوسي.

د هغه په وینا، هر هغه ځای چې دا ډله یې وغواړي، د افغانستان دولت له دې ډلې سره خبرو ته چمتو دی.

ښاغلي غني وویل چې چې هیوادوال باید له طالبانو سره د خبرو بهیر وویني چې پوه شي دواړه لوري په کومو مواردو ځیرنه لري.

څو مودې وړاندې، د ملي امنیت شورا سلاکار، حمدالله محب هم اعلان وکړ چې د سولې د خبرو راتلونکی پړاو باید په هیواد کې دننه ترسره شي.

طالبانو تراوسه د دولت دې غوښتنې په ځواب کې څه ندي ویلي.

خو مخکیني ولسمشر حامد کرزي له امریکا غږ ټلویزیون سره په مرکه کې، په هیواد کې اوسنی حالت له طالبانو سره د خبرو د ترسره کیدو لپاره مناسب نه دی بللی.

هغه وویل: په هیواد کې دننه د افغانانو ترمنځ د خبرو ترسره کیدل، زمونږ ټولو هیله ده. خو په اوسنیو شرایطو کې به عملي نشي.

ښاغلي کرزي همداراز د جګړې په ډګرونو کې د حکومت او طالبانو په کړنو نیوکه کړې؛ هغه حکومت په بمباریو او پوځي بریدونو او طالبان د واټونو او عامه ګټو په زیانمنولو تورن کړل.

مخکیني ولسمشر د راتلونکي سیاسي نظام او د جوړیدو څرنګوالي اړوند ګونګوسو ته ګوتڅنډنې سره وویل، په دې اړه د پریکړې واک د افغانستان د خلکو دی؛ نه د اوسني دولت او طالبانو.

دا څرګندونې په داسې حال کې کیږي چې اوس مهال د افغانستان دولت او طالبانو ډلې ترمنځ خبرې د درییو اوونیو لپاره ځنډول شوي او د دواړو لوریو پلاویو د دې پریکړې موخه، د سولې د مسایلو اړوند لا ډیرې سلاوې په ګوته کړې ده.