د قطر په خبرو کې د دولت د مرکچي پلاوي یو غړی دا پړاو خبرې د افغانستان او سیمې لپاره حیاتي بولي او پر معنالرنې یې ټينګار کړی دی.

 

د دوحې خبرې له نږدې درییو میاشتو راپدیخوا هیڅ خوځښت نلري؛ بلکې په اړه یې هیله مندي هم لږه شوې ده. خو د یوه اوږد ځنډ وروسته، دولت او طالبانو یو ځل بیا د خبرو د بیا پیل لپاره ګام اوچت کړی دی.

مولوي عطاءالله لودین، عنایت الله بلیغ، امین احمدي او فوزیه کوفي د دولت د مرکچي پلاوي څلور غړي دي چې نن (درې نۍ، غبرګولي یولسمه)، د خبرو د بیا پیل په موخه دوحې ته تللي دي.

پاتې غړي هم تمه ده د راتلونکې اونۍ د درې نۍ په ورځ دوحې ته ولاړ شي.

د دولت د مرکچي پلاوي غړې، فوزیه کوفي دا پړاو خبرې د افغانستان او سیمې لپاره مهمې بللې دي.

هغې په خپله ټویټر پاڼه لیکلي دي: “د قطر په لاره یوو. هیله مند یوو چې معنالرونکې خبرې ولرو او پایلې یې، په افغانستان کې د وینې توییدنې او د افغانستان د خلکو د رنځ د پایته رسیدو لامل وګرځي. اړتیا ده چې په خبرو کې ډیره لیوالتیا او رښتینولي ولرو؛ ځکه راتلونکې څو میاشتې د افغانستان او سیمې لپاره حیاتي دي.”

On the way to Qatar, hoping for a meaningful and result based negotiation this time to end the bloodshed and suffering of my people.We need to see more willingness and sincerity in the talks as the few months ahead of us are crucial for Afghanistan and the region. pic.twitter.com/otqgb3bc50

— Fawzia Koofi (@FawziaKoofi77) June 1, 2021

له دي سره هم مهاله، د طالبانو ډلې هم د خبرو د بیا پیل اړوند د چمتووالي اعلان کړی دی.

له بلې خوا، نن په کابل کې یو شمیر فرهنګیانو، د سولې لپاره د یو غږ په نوم ناسته جوړه کړې وه.

په دې ناسته کې یو شمیر شاعرانو، په هیواد کې د جګړې او تاوتریخوالي په پایته رسیدو ټینګار وکړ او له لوریو یې وغوښتل چې خپل اختلافونه د خبرو له لارې هوار کړي.

د یادونې ده چې په وروستیو څو میاشتو کې د سولې بهیر ټکنی وو؛ پر وړاندې بیا، جګړې او تاوتریخوالي زور اخیستی وو. هغه څه چې د هیوادوالو اندیښنې ډیرې کړې دي.