وروسته له هغې چې د امریکا سفارت د خپلو مرستو دوام اړوند د نړیوالې ټولنې له بی باورۍ او په حکومت کې دننه د دې پیسو حیف او میل کیدو خبر ورکړ او ویې ویل چې حکومت له اداري فساد سره جدي مبارزه نه ده کړې.اوس له بد اقتصادي حالت څخه اندیښنې را ولاړې شوې دي.

یو شمیر اقتصادي کارپوهان په داسي حال کې چې افغانستان یو لګښتي هیواد بولي،د فساد زیاتوالی په تیرو ۱۸ کالونو کې د هیواد د اقتصاد ودې پر وړاندې له سترو کړکیچونو یادوي.

په همدې حال کې د افغانستان د روڼتیا بنسټ له اداري فساد سره د مبارزې بی پایلې پاتی کیدل د عدلې او قضایې بنسټونو نه خپلواکي او په لوړو حکومتي برخو کې د اداري فساد له دوسیو سره سیاسي چلند پوری تړلي بولي.

خو لویه څارنوالي بیا له د فساد له درندو جرمونو سره د مبارزې عدلي او قضایې مرکز له لوري د فساد ۲۰۰ سترو دوسیو ته له رسیدنې خبر ورکوي چې په کې ۷۰ دوسیې د لوړپوړو دولتي چارواکو شاملې دي.

اداري فساد نه یوازی دا چې په دننه هیواد کې د چارواکو له لوري ترسره شوی دی بلکې لمن یې حتی له هیواد څخه بهر هم رسیدلې ده.

په دې وروستیو کې د ټاکنو خپلواک کمېسیون مخکینی مشر او د مشرانو جرګې اوسنی غړی احمدیوسف نورستاني په امریکا کې دیوې فدرالي محکمې له لوري  د څه د پاسه سل زره ډالرو په ارزښت د دې هیواد د عمومي بودجې په غلا محکوم شوی دی.