دې بنسټ په هیواد کې د کرونا ویروس پر وړاندې د مبارزې لپاره؛ د مکروب ضد توکو، دست کشو او ماسکونو د ویش بهیر پیل کړ چې په بلخ کې به لسو زرو کسانو ته وویشل شي.

په افغانستان کې د کرونا ویروس خپراوي، په تیرو ورځو کې د هیوادوالو جدي اندیښنې راپارولي او خلکو تل په دې اړوند د مبارزې لپاره د مرستو غوښتنه کړې.

د نبي زاده مرستندویه بنسټ د مرستو ویشلو پازوال، احمد نژند رحیمي په دې اړه وویل چې په دې کمپاین کې؛ تمه ده د بلخ لسو زرو اوسیدونکو ته، د مکروب ضد توکي، دست کشې او ماسکونه وویشل شي او دا مرستې به د پنځو ورځو لپاره روانې وي.

هغه همداشان ټینګار وکړ چې دا کمپاین د نبي زاده شرکتونو د مشر، کمال نبي زاده په سپارښتنه پیل شوی او تمه ده دا بنسټ له اړمنو کسانو سره د خوراکي توکو د مرستو بهیر هم پیل کړي.

په همدې حال کې، د دې مرستو یو شمیر برخه من؛ په داشان حالاتو کې د دې کمپاین ستاینه کوي او دا د کرونا ویروس پر وړاندې د مبارزې لپاره ګټور بولي.

دوی له نورو مرسته رسوونکو بنسټونو غواړي چې داشان مرستې وکړي.

له دې سره، دې بنسټ مخکې له دې هم په هرو شرایطو کې په بیړنۍ توګه د هیواد په بیلابیلو برخو کې د اړمنو کسانو لاسنیوی کړی دی.

آرزو نیوز – شاکر شکران