مارشال عبدالرشید دوستم چې امنیتي ځواکونو ته د سلا ورکونې په پار د جوزجان آقچې څلور ګونو ولسوالیو د جګړې لومړۍ کرښې ته تللی یو ځل بیا یې د طالب جنګیالیو په ځپلو ټينګار کړی دی.

مارشال دوستم وايي چې طالب جنګیالي د امنیتي ځواکونو له نیولو وروسته وژني له همدې کبله امنیتي ځواکونه باید دوی په کره توګه موخه وګرځوي او له منځه یې ویسي.

په همدې حال کې د جوزجان والي وايي چې د جوزجان – مزارشریف پر لویه لار یو شمیر سیمې د طالبانو له شتونه چڼ شوي او تر نږدې راتلونکو ورځو به د آقچې لار هم د تګ راتګ کوونکو پر مخ پرانیستل شي.

له دوو اوونیو را په دې خوا د جوزجان – مزارشریف لویه لار د جګړې شاهده وه او په دې مهال کې د امنیتي ځواکونو څو پوستې هم د طالبانو لاسته لویدلې دي.