د پاکستان لومړي وزیر د امریکا له ولسمشر سره په لیدنه کې ویلي چې واشنګټن او اسلام آباد په افغانستان کې د سولې د ټینګیدو په برخه کې ګډ دریځ لري.

د پاکستان لومړي وزیر عمران خان، د امریکا له ولسمشر ډونالډ ټرامپ سره په لیدنه کې د افغانستان د حکومت او طالبانو ډلې ترمنځ د خبرو پر پیل ټينګار کړی دی.

دواړو خواوو په سویس کې د نړۍ د اقتصادي ناستې په څنډه کې سره ولیدل، چې په دې لیدنه کې د پاکستان لومړي وزیر ویلي چې هیواد یې د افغانستان د وضعیت اړوند، له امریکا سره ګډ دریځ لري.

هغه زیاته کړه: “کلیدي مسایل شتون لري چې غواړو پرې بحث وکړو. له دې ډلې د افغانستان سکالو چې د امریکا او پاکستان د اندیښنې لامل ګرځیدلې ده. له نیکه مرغه دواړه هیوادونه ګډ دریځ لري او په دې هیواد کې د سولې د ټینګیدو او همداشان د طالبانو او افغانستان حکومت ترمنځ د خبرو له لارې د واک د سوله ییز لیږد لپاره لیواله یوو.”

له یوه کال ډیره موده کیږي چې قطر، د افغانستان د سولې اړوند د امریکا او طالبانو د استازو کوربه دی، خو لا هم د دواړو لوریو ترمنځ هوکړه نه ده لاسلیک شوې او ډیرۍ مهال دا خبرې له ماتې سره مخامخ شوې دي.

له بلې خوا د افغانستان د پالیسۍ ډلې د “سولې بهیر کې د خلکو غږ” په نوم نوې څیړنه کړې، چې ښيي ۶۰ سلنه پوښتل شویو د امریکا او طالبانو ترمنځ خبرو ته خوښي ښودلې ده.

په دې څیړنه کې، د بلخ، ننګرهار، کندهار، هرات او بامیان ولایتونو د ۶۰۰ وګړو لیدلوري راټول شوي دي.

د افغانستان د پالیسۍ ډلې همغږی کوونکی، فهیم دشتي، د دې ګزارش په اړه وایي: ۶۰ سلنه پوښتل شوي خوشبینه دي. د پاتې ۴۰ سلنه پوښتل شویو څخه، ۳۰ سلنه یې د پایلو اړوند اندیښمن دي او یواځې لس سلنه بیا بدبینه دي.

د سولې د خبرو اترو له بهیره د هیوادوالو لرې ساتل بله هغه سکالو ده چې په دې څیړنه کې پوښتل شویو پرې نیوکه کړې ده.

آرزو نیوز- شمس الرحمن سباوون خپلواک