د ټرامپ د ادارې د دفاع وزیر مارک اسپیر، ویلي دي چې سپینه ماڼۍ دې پر طالبانو د لا ډیر فشار راوستلو لپاره، په افغانستان کې  خپل سرتیري وساتي.

 واشنگتن اگزمینر راپور ورکړی دی چې د ټرامپ د دورې د دفاع وزیر مارک اسپیر او د اوباما د ادارې د دفاع وزیر رابرت ګیتس د جوبایډن ادارې ته سپارښتنه کړې چې پر طالبانو دې د لا ډیر فشار راوستلو لپاره، په افغانستان کې پاتې شي.

دوی ټینګار کړی دی چې سپینه ماڼۍ نباید د دوحې د هوکړه لیک پربنسټ، تر مې میاشتې خپل ټول ځواکونه له دې هیواده بهر کړي.

د ټرامپ د ادارې د دفاع وزیر مارک اسپیر د بروکینس په ټولنه کې په خپلو ویناو کې وویل چې له طالبانو سره په ژمنه کې د وتلو مخ آړ دا وو چې طالبانو پر خپلو ژمنو عمل وکړي.

هغه زیاته کړه: “ مونږ د دوحې په هوکړه لیک کې په ښه نیت سره عمل کړی دی، خو دا باید ووایم چې طالبانو عمل نه دی کړی. د دې هوکړې یوه مهمه برخه د تاوتریخوالو کمښت د افغانستان له حکومت سره خبرې اترې او له القاعدې شبکې سره د اړیکو پرې کیدل دي.”

مارک اسپیر چې د ۲۰۲۰ زیږدیز کال په نومبر میاشت کې د دونالډټرامپ له لوري ګوښه شو. د خپلو ویناو پر دوام یې وویل: “ د خپل کار په وروستیو ورځو کې مې په ډاګه وویل چې مونږ باید خپل ۴۵۰۰ ځواکونه په افغانستان کې وساتو ترڅو زمونږ لپاره د بهر کیدو شرایط برابر شي.”

د آمریکا دا مخکېنی پوځي د دې په ویلو سره چې د بایډن اداره د چارو د پر مخ وړو لپاره په کړکیچونو شرایطو کې دی، زیاته یې کړه: “ د جګړې په ډګر کې هم  باید ټول ګامونه په افغانستان کې زمونږ له شریکانو، د متحدو هیوادونو او اروپايي شریکانو سره په نږدې همغږۍ ترسره پورته شي.”

له دې سره هم مهاله، د اوباما د ادارې د دفاع وزیر له واشنګټن پُسټ سره په مرکه کې، د بایډن له ادارې غوښتي په افغانستان کې د حضور او یا هم آمریکايي پوځيانو د ډيریدو اټکل په صورت کې، له ناټو سره یو ځای خبرې وشي.

هغه زیاته کړه: “ لازمه ده په افغانستان کې د خپل اټکلیز حضور په اړه په ناټو کې له خپلو متحدانو سره خبرې وکړو،  یا خپل اوسني ځواکونه وساتو او یا هم دا چې د دې ځواکونو شمیر لږ ډير کړو. مونږ به په افغانستان کې د یو مهال لپاره پاتې شو.”

د دوحې د هوکړه لیک پر بنسټ، آمریکا تر دوو راتلونکو میاشتو(د اپریل تر پایه) باید په افغانستان کې خپل پوځي حضور صفر ته ورسوي. خو د بایډن ادارې د خپلې کاري ورځې له لومړیو څخه، طالبان د دې تړون په نقض تورن کړل او د سپینې ماڼۍ له لوري یې د دوحې د هوکړه لیک له بیا کتنې خبر ورکړ.

خو طالبانو مخکې له دې، د دوحې هوکړه لیک عملي کیدو ته ځان ژمن بللی او د دې تړون هر ډول بدیل لپاره هڅه یې ناکامه بللې ده.

آرزو نیوزـــ شمس الله رحیمي