په روان یږدیز کال کې په افغانستان کې د غنمو حاصلات ۴۲ سلنه زیات شوی دی.

دکرنۍ او مالدارۍ وزارت ویاند اکبر رستمی وایې چې ددې وزارت څيړنې ښیې چې د سږکال تر پایه به د للمې او په اوبو کرل شویو غنمو حاصلات څه دپاسه پنځه میلیون مټریک ټنو ته ورسیږي.

ددې ادارې پازوال وایې چې په روان کال کې د غنمو حاصلات په تیرو اتلسو کالونو کې بی ساری وو.

دکرني وزارت د شمیرنو پر بنسټ هر کال هیواد ته ۲،۵ میلیونه ټنه غنم او اوړه راوړل کیږي،خو که چیري د غنمو حاصلات همدا شان زیات شي تر راتلونکو دریو کالونو به افغانستان د غنمو د تولید له اړخه ځان بسیا ته ورسیږي.

ښاغلی رستمي زیاته کړه په روان کال کې ۳،۳ میلیون هکتاره ځمکه غنم کرل شوې ده،په داسي حال کې چې تیر کال بیا دا شمیرنه ۲،۲ میلیون هکتاره ځمکې ته رسیده.

تیر کال وچکالۍ په هیواد کې ډیری غلو ته تاوان اړولی وو چې په دې کال کې د غنمو دتولید کچه په هیواد کې ۳،۵ میلیونه ټنو ته رسیدلې وه.

 

آرزو خبري سایټ ــ شمس الله رحيمي