د ولسمشر دویم مرستیال وایي چې د کلیو اوسیدونکي له ښاریانو ډیر، د خوړو ناخوندیتوب له ګواښ سره مخامخ دي.

 

د ولسمشر دویم مرستیال، سرور دانش، نن (پنځنۍ، لړم ۱۵)، د خوړو د امنیت او تغذیې د ملي برنامې په درییمه کلیزه کې وویل چې په هیواد کې ۱۳ میلیونه وګړي د خوړو له ناخوندیتوب سره مخامخ دي.

د ښاغلي دانش په وینا، له دې منځه اته میلیونه د خوړو د امنیت نشتون له سخت حالت سره مخ دي او د کلیو اوسیدونکي د ښاریانو په پرتله ډير له دې ګواښ سره مخامخ دي.

هغه وویل چې اوس مهال نه یواځې افغانستان، بلکې نړۍ د خوړو د امنیت له ستونزې سره مخامخه ده.

د کرنې، اوبو لګولو او مالدارۍوزارت واکپال، انورالحق احدي هم په دې ناسته کې وویل چې د هیوادوالو لپاره د بسیا خوړو شتون د دې وزارت لویه موخه ده او هڅې روانې دي چې په نږدې راتلونکي کې افغانستان د خوړو د لرلو له پلوه، ځان بسیاینې ته ورسیږي.

په همدې حال کې د عامې روغتیا وزارت واکپال، احمدجواد عثماني، د خوړو د ناخوندیتوب لوړه کچه، د مړینو د شمیر د ډيریدو او د اقتصادي تاوان لامل په ګوته کړی.

عثماني وویل چې په افغانستان کې د خوړو د خوندیتوب د ښه والي لپاره، ګڼ سکټورۍ تګلارې ته اړتیا ده او د روغتیا وزارت په دې برخه کې همکاریو ته چمتو دی.

له بلې خوا، په افغانستان کې د خوړو برنامې مشرې، میري ایلن ګرورتي وویل چې د خوړو د امنیت ملي اجنډا د خوړو د امنیت او تغذیې د پرمختګ په لور د افغانستان دولت ښکاره ژمنه ده.

هغې وویل چې په افغانستان کې هیڅ بنسټ او د ملګرو ملتونو سازمان یواځې نشي کولای چې د لوږې د لمنځه وړلو په برخه کې بریالی شي، ځکه دې ته ټولیز او ډله ییز کار ته اړتیا ده.