د عامې روغتیا وزارت وایي چې په تیرو ۲۴ ګړیو کې، په افغانستان کې په لسو ولایتونو کې د کرونا ویروس ۱۱۰ نوې مثبتې پيښې ثبت شوې دي.

 

د عامې روغتیا وزارت ویاند، وحیدالله مایار، نن (څلورنۍ، غوایي۱۰،اپریل۲۹)، په یوې خبري ناسته کې وویل چې په تیرو ۲۴ ګړیو کې په هیواد کې د کرونا ویروس ۱۱۰ نوې مثبتې پيښې تثبیت شوي چې له دې سره، په کرونا د اخته کسانو ټولیز شمیر، ۱۹۳۹ ته ورسید.

د دې وزارت د شمیرنو پر بنسټ، نوې پيښې؛ کابل ۵۸، کندهار ۱۵، پکتیا ۱۲، غزني ۶، ننګرهار او لغمان هر یو ۵ پيښې، تخار او فراه هر یو درې پيښې، هلمند دوه او په کندز کې هم یوه مثبته پيښه ثبت شوې دي.

په تیرو ۲۴ ګړیو کې، همداراز د یوې ښځې په ګډون درییو تنو په هرات ولایت کې د کرونا ویروس له کبله خپل ژوند له لاسه ورکړی چې له دې په هیواد کې د دې ویروس له کبله د مړینو شمیر، ۶۱ تنو ته ورسید.

له بلې خوا، د عامې روغتیا وزارت ویاند ټینګار لري چې په کرونا ویروس د اخته کسانو له منځه، تراوسه ۲۵۲ تنه روغ شوي دي.