تمه ده د نړۍ د یوشمیر هیوادونو مشران په جاپان کې د شل ډلې د ناستې په څنډه کې سره لیدنه او خبرې اترې وکړي.

د راپورونو پربنسټ د نړۍ د ۲۰ غوره اقتصادونو دمشران ناسته تر یوې راتلونکې اونۍ د (۲۰۱۹)زیږدیز کال جون میاشتې په پاي کې په جاپان کې ترسره شي.

د رویټرز خبرپاڼې لیکلې دي چې د امریکا ولسمشر دونالدټرامپ ویلي دي جاپان ته په خپل سفر کې به د جی شل ناستې په ترڅ کې له خپل روسي سیال ولادیمیرپوټين او د چین له ولسمشر شي جینګ پینګ سره لیدنه وکړي.

ټرامپ زیاته کړې ده چې ددې هیوادونو له مشرانو سره په لیدنه کې له دواړو هیوادونو سره د ښو اړیکو پر اړتیا ټینګار لري.

په همدې حال کې داسي راپورونه هم خپاره شوي دي چې د چین ولسمشر شي جینګ پینګ چې د دو ورځو لپاره پیونګ یانګ ته تللی دی،د شمالي کوریا له مشر سره له لیدنې وروسته په جې شل ناسته کې د ګډون او د نړۍ د هیوادونو له مشرانو په تیره بیا دامریکا د ولسمشر دونالډټرامپ سره د لیدنې لپاره جاپان ته لاړ شي.

تمه کیږی چې د یوشمیر نورو هیوادونو مشران هم په جاپان کې په روانه میاشت کې د جې شل ناستې په څنډه کې پر بیلابیلو سکالو او دوه اړخیزو اړیکو لیدنه او خبرې اترې وکړي.

آرزو خبري سایټ ــ شمس الله رحيمي