هغه تاریخ چې له خاورو لاندې سر پورته کوي او بیرته ژوندی کیږي.

لرغونپوهان توانیدلي ترڅو په تیرو څه باندې څلورو کالونو کې، د کندهار زاړه ښار لرغونې کلا کې پلټنو سره څه باندې سل د لیږد وړ او نالیږد لرغوني اثرونه چې د بابریانو او شاه حسین هوتک د واکمنې له بیلابیلو دورو څخه دي وموندي.

کاظم نیازی یو له لرغونپوهانو دی، هغه وايي چې د سپړنې په لړ کې ډيری تر لاسه شوي آثار، د شاه حسین هوتک له زمانې څخه دي.

د کندهار د اطلاعاتو او فرهنګ ریاست پازوال هم وايي چې په کندهار کې د نارنج ماڼۍ د سپړنې د پروژې په پیل سره تر دمګړۍ توانیدلي چې د بیلابیلو دورو او په ځانګړې توګه د شاه حسین هوتکي د مهال سلګونه سکې، مجسمې او حوضونه ومومي.

د کندهار د اطلاعاتو او فرهنګ ریاست مشر حکمت الله افغان زیاتوي چې یو شمیر د لیږد وړ اثرونه د لا ښې ساتنې او ډيری پیژندنې لپاره د هیواد ملي موزیم ته لیږدول شوي دي.

په کندهار کې لرغونپوهان په داسې حال کې توانیدلي چې د لیږد وړ نالیږد آثار وموندي چې د پازوال په وینا د جګړې په پایله کې تر اوسه په لس هاو لرغونو آثارو په دې ولایت زیان لیدلی دی.

له دې ټولو سره لرغون پوهان له حکومت څخه غواړي ترڅو په هیواد کې د لرغونو ځایونو ساتنې په برخه کې ډیره هڅه وکړي.